لسه ناقل في شقتي الجديده

لكن الغريب ان البقعه اللي على كتف بسنت كان حجمها بيصغر مع صغر حجم القمر في كل ليله لغاية ما وصلنا لليله اللي بيكون فيها القمر محاق ومابيظهرش وساعتها اول ما الليل ظهر والبقعه اللي على كتف بسنت اختفت بدأ الدخان اللي في الاوضه يتجمع حوالين جسمها في موجه شبه اعصار قمعي وبعدها بدأ يدخل من بوقها ومناخيرها لما جسمها بدأ يتنفض بعنف وكل ما يتنفض اكتر كل ما لونها يبهت ويزرق لغاية ما همدت وبعد ما همد جسمها لثواني راحت قايمه بنصها الفوقاني نص قومه وبصتلي

لكن كانت عينيها كلها بيضه بنفس عينين الكيان او الشبح

وساعتها صرخت واتنفضت من نومي..

كنت بحلم..

لكن المفزع اكتر اني اول ما اتنفضت من نومي وصحيت لقيت ش@بح البنت المتكممه واقف جمبي على طرف سرير بسنت وعينيها كلها بياض زي ما شفت عينين بسنت في الحلم وحاطه صباعينها السبابه والوسطى على نص جبهتي ولمده ثانيه كنت شايفها وبطوح بايديا من الرعب وبعدها اختفت

فقمت بصيت على كتف بسنت لقيت البقعه السودة على دراعها فعلا

فعرفت ان كل الكلام اللي حصل بيني وبين بسنت

قبل ما اهدي نور الاباجوره وانام كان حقيقي،،

اما من ساعة ما شباك اوضتها اتفتح ودخل الدخان والليل بقا ييجي ورا النهار بتعاقب سريع فكل دا كان حلم..

او مش حلم بالمعنى الحرفي للحلم..

كان رساله ورهاني الكيان لما حط صوابعه على راسي وصحيت بعدها لقيته قدامي..

ساعتها كملت صاحي لغاية الصبح واول ما النهار طلع اخدت مراتي وبسنت واخدت حاجاتنا الخفيفه

 وروحنا نقلنا في بيت حماتي..

ماكنتش عارف افكر في اي حاجه ولا اعمل اي حاجه والغريب ان لمدة يومين كانت البقعه السوده اللي على كتف بسنت بتختفي في النهار وبتظهر في الليل بنفس رسمة القمر

تقريبا كنت فاهم الرساله اللي شفتها في الحلم لكن في نفس الوقت مش راضي اصدقها وهي ان الش@بح هيسكن جسم بنتي في ليلة المحاق..

اما بسنت فكانت كل ليلة بتقوم من نومها مفزوعه مع انها نايمه معانا انا ومامتها..

كنت زي اللي عاجز عن التفكير او الحركه لدرجة اني اخدت اجازه من شغلي لما بقيت مش مركز وبلمح بطرف عيني البنت الصغيره في كل مكان الصبح وبالليل وكأن عقلي هو اللي بقا بيطاردني مش هي..

لغاية ما وصلنا ليلة المحاق بسرعه اكبر مما تخيلت والساعه واحده وخمسه بالظبط بدأ جسم بسنت يتنفض ويزرق وانا وامها بنحاول نفوق فيها لغاية ما جسمها همد بعدها رجع لونها طبيعي وقامت نص قومه وميلت على ودني وقالت بصوت وخيم

- اغتص@بوها وق@تلوها في الحمام بتاعك

فحضنت بسنت وانا برتجف لكن جسمها كان بارد زي التلج

فساعتها قلت لامها اللي كانت بتعيط ومنهاره=اطلعي انتي بره

فطلعت وقفلت باب الاوضه وراها فبعدت بسنت عن حضني وقمت وقفت في الاوضه وانا عاطيها ضهري بس كنت شايفها وباصصلها في مراية التسريحه وقلت للكيان اللي سكن بسنت.

- هم مين ؟؟

فرفعت صوباعينها بعلامة النصر وهزيتهم وهي باصه للمرايه= كانوا اتنين

-عارفه اسمهم ؟؟

=عارفه شكلهم،،لكن ماشفتهمش من ساعة ما قتلوها

-والمطلوب ؟؟

=تدف@ن الجسد وتوصل للجاني

-والجسد فين؟؟