ابني ميطلعش منه العيبة

جوزى توفى وابنى طفل صغير وابنى الحمد لله طول عمره متربى كويس قوى لدرجة انى عمرى فى حياتى ما قلت له ذاكر وعمره ما شرب سېجاره ولا عمل مشكله ليا لا فى المدرسه ولا مع الجيران وحتى لما دخل الجامعه كان بيقدم على تدريب فى الصيف فى بنوك وشركات وكان بينزل يشتغل ويرجع متأخر كإنه موظف
حصل مره موقف ان اختى كانت عندنا ومعاها بناتها وبنت اختى ادعت ان ابنى عمل معاها تصرف مش كويس وانا متأكده ان ده محصلش لكن حصلت مشكله كبيره مغ اختى لدرجة اننا قاطعنا بعض من ساعتها واخواتى البنات وقفوا فى صفها
الكلام ده كان من حوالى 20 سنة وفضلنا اكتر من 10 سنين مش بنكلم بعض نهائى وبعدها بدأنا نتكلم على خفيف جدا فى مناسبه او عيد من غير ما نتقابل وباقى اخواتى بتعامل معاهم على خفيف

وهى لمحت لى مره ان اللى حصل كان تأليف من بنتها وان بنتها كانت متعبه فى تربيتها وانا قفلت على الكلام لانى واثقه فى ابنى واخلاقه والحمد لله دلوقت راجل محترم كل الناس بتحلف باخلاقه
اخر سنتين بدأت اكلم اختى تاني بشكل اكبر وحكت لى ان بنتها فى مشاكل كبيره مع جوزها ودلوقت وصلت للطلاق وفيه قضايا بينهم وهى بتشتكى ان جوز بنتها شال ايده من كل حاجه وهى عندها ولد ومش راضى يدفع مصاريف مدرسته وحوار طويل
وحسيت انها بتطلب بشكل غير مباشر لو اقدر اساعدها وطبعا انا كبيره على المعاش فعارفه انها تقصد لو ابنى يساعد بنتها وانا مش عارفه اقوله ولا لا
لان مفيش تواصل نهائى بينه وبين خالاته من ساعة الموضوع ده وانا مش عارفه اتصرف ازاى هل اسيب الوضع على ما هو عليه ولا اتكلم معاه